Du 2 aoust 1713 vente Marie delavoye veuve de pierre Grenon et pierre

Girard a Romain Delavoye,

Pardevant le notaire Royal en la prevosté de quebec soussigné

y residant, et tesmoins cy bas nommes furent presens Marie Delavoye

veuve de deffunt pierre Grenon vivant habitant demeurant en la seigneurie

de Neuville et pierre Girard veuf de deffunte Suzanne Delavoye habitant

demeurant en la seigneurie Demaure, lesquels de leur bon gré et volonté en

presence de et du consentment de Noel Berteaume au nom et comme ayant

espousé Marie Girard fille et heritiere de ladite deffunte delavoye sa mere

aussy a ce present ont vendu, ceddé, quitté, delaissé, transporté, et

abandonné des maintenant, et a toujours, et promettent Chacun a leur

esgard garantir de tous troubles, dettes et hipoteques Generallement

quelconque a Romain deLavoye leur frere consengain aussy habitant

demeurant en ladite seigneurie Demaure a ce presnet, et acceptant

acquereur pour luy ses hoirs et ayant cause a ladvenir C'est a scavoir

la part et portion que ladite marie Delavoye et les six enfants issus dudit

Girard et de laditte deffunte Suzanne delavoye sa femme comme

representants leur dite mere peuvent avoir, et pretendre en une terre

et habitation size et scituée en ladite seigneurie Demaure contenant

trois arpens de large sur le bord du fleuve saint Laurent sur trente

arpens de proffondeur dans les terres circonstance et despendance d'icelle

comme heritiers chacuns pour un quatre' de ladite deffunte Jacquette

Grignon leur mere, et grande mere vivante premiere femme de

deffunt pierre Delavoye, et comme heritiers chacun pour un sept'e

dudit deffunt pierre Delavoye leur pere et ayeul avec ledit acquereur

et marianne et magdelaine Delavoye enfans du second lit dudit

feu DelaVoye, et de Elizabeth Laupé sa seconde femme sans

aucune chose en reserve ny retenu ladite habitation joignant

du coste du soroest a l'habitation de françois Tinon dit Delauriers

et du Costé du nord est a celle de la veuve et heritiere de deffunt pierre

Valliere Pour desdites portions en ladite habitation a eux

appartenant jouir, faire et disposer par ledit acquereur sesdits hoirs

et ayant cause en toute proprietté a perppetuité en vertu des presentes,

Cette vente, Cession et transport ainsy faite a la charge

par ledit acquereur de payer de ce jour a ladvenir les portions de cens et

rentes seigneurialles dont lesdite portions de terre cy dessus vendues

peuvent estre Chargées par chacun an envers le domaine de ladite

Seigneurie Demaure en la sensive de laquelle elle est au prorata

du total de ladite habitation, Et outre ce pour et moyennant le

prix et somme de deux cens livres pour lesdites deux portions ce qui

fait pour Chacune d'ycelle part celle de cent livres que ledit acquéreur

a présentement payé content Scavoir cens livres a ladite marie

Delavoye pour sadite part, et audit Gérard pareille somme de cent

livres pour sesdits enfans comme heritiers par representation de

leur dite mere aussy pour lesdite part desquelles sommes de cent livres

chacun ils quittent, et deschargent ledit acquereur, et promettent

l'entenir quitte, et deschargé, au moyen de quoy ils luy ceddent, et

transportent tous droits de proprietté & s'en demettant &, et

consentent & Car ainsy a esté convenu sous l'obligation &

Renonçant & fait, et passé audit quebec en lestude dudit

notaire apres midy le deux' jour d'aoust mil sept cent treize en

presence des sieurs estienne Mirambeau marchand demeurant et

francois arnaud tesmoins demeurants audit quebec qui ont

avec nous notaire signé lesdites parties, et ledit Berteaume

ayant declarer ne sçavoir escrire ny signer de ce enquis,

Arnaud

Mirambeau

Chambalon N're